Таатта народнай театырын чаҕылхай артыыстарыттан биирдэстэрэ, сыана бэтэрээнэ Михаил Иванович Тихонов төрөөбүтэ 90 сылыгар аналлаах куйаар ситимин нөҥүө эр дьон оруолун арыйыыга күрэс ыытылынна.

Бүгүн, ахсынньы 18 күнүгэр, Өрөспүүбүлүкэтээҕи норуот айымньытын дьиэтин уонна Улуустааҕы норуот айымньытын дьиэтин тэрийиитинэн СӨ култууратын туйгуна, Былатыан Ойуунускай аатынан Таатта народнай театырын чаҕылхай артыыстарыттан биирдэстэрэ, сыана бэтэрээнэ Михаил Иванович Тихонов төрөөбүтэ 90 сылыгар аналлаах куйаар ситимин нөҥүө эр дьон оруолун арыйыыга күрэс ыытылынна. Күрэскэ Үөһээ Бүлүү, Нам уонна Таатта улуустарыттан барыта 11 үлэ киирдэ. Дьүүллүүр сүбэҕэ Улуустааҕы норуот айымньытын дьиэтин директора Г.Г.Вырдылин, Былатыан Ойуунускай аатынан Таатта народнай театырын режиссера В.Ф.Бурнашева уонна М.И.Тихонов дьиэ кэргэнэ үлэлээтилэр. Түмүккэ Гран При үрдүк аатын Үөһээ Бүлүүттэн Алексеев Андрей (бирииһэ 5 тыһ.солк.), 1 миэстэни Таатта Чымнаайытыттан Нестеров Анатолий (бирииһэ 4 тыһ.солк), 2 миэстэни Таатта Игидэйиттэн Лопатин Марат (бирииһэ 3 тыһ.солк.), 3 миэстэни Таатта Хара-Алданыттан Самсонов Петр-Бүөтүр Хара (бирииһэ 3 тыһ.солк.) ыллылар. Вконтакте сыһыарыы нөҥүө ыытыллыбыт “Көрөөччү биһирэбилэ” анал бирииһи (417 “лайктаах”) Нам Хатырыгыттан Захаров Василий Егорович ылан, 3 тыһ. солкуобайынан бэлиэтэннэ. Бириистэри М.И.Тихонов дьиэ кэргэнэ уонна Улуустааҕы норуот айымньытын дьиэтэ туруорда. Күрэскэ кыттыбыт, үлэлээбит дьоммутугар истиҥник махтанабыт.
Тэрээһин үөрүүлээх чааһын бу сигэнэн киирэн көрүҥ диэн ыҥырабыт: https://vk.com/wall-217249400_2416