✨ ТУЙМААДА ЫҺЫАҔАР ТААТТАБЫТ ЧУЛУУ УОЛАТТАРЫН ӨРӨГӨЙӨ
Өрөспүүбүлүкэбит саамай сүрүн, улахан ыһыаҕар — Үс Хатыҥҥа ыһыллыбыт өрөгөйдөөх Туймаада ыһыаҕар биһиги улууспут дьоно ураты бочуоттаах, ытык оруоллары толорон, Тааттабыт албан аатын өссө төгүл үрдүктүк ааттаттылар! Ол курдук Тааттабыт кэскиллээх, эдэр ыччата, «Алгыстаах тойук» сиэр-туом олуктарын өрөспүүбүлүкэтээҕи күрэҕин кылаан кыайыылааҕа Иван Иванов Туймаада ыһыаҕын сүрүн алгыһын сиэрин-туомун бэрт уус-ураннык уонна дириҥ ис хоһоонноохтук алҕаата. Кини күүстээх куолаһа уонна ис киирбэх алгыс тыллара мустубут тыһыынчанан дьон кутун-сүрүн уһугуннарда, арчылаата уонна уйгу-быйаҥ олохтоноругар күүстээх тирэх буолла. Онтон Таатта удьуор олонхоһута, Үөһээ Бүлүүгэ ыытыллыбыт Олоҥхо Ыһыаҕын «Кылаан чыпчаал» бирииһин хаһаайына Афанасий Попов ыһыах саамай ытык бэлиэтин — өбүгэ күүһүн уонна норуот сомоҕолоһуутун түмэр ураты Дуоҕаны бочуоттаахтык арыаллаан киллэрэр үрдүк чиэскэ тигистэ. Афанасий Попов бэйэтин уопутунан уонна ытык сиэринэн-туомунан улуу түһүлгэҕэ саха мааны үгэһин ураты таһымҥа таһаарда. Талааннар үөскээбит талба Тааттабыт дьоно өрүү бастыҥнар ортолоругар сылдьалларынан, өбүгэ ытык үгэһин ураннык үйэтитэллэрин ис сүрэхпититтэн киэн тутабыт!
