Ытык Таатта ыһыаҕар Арассыыйаҕа Сомоҕолоһуу, Саха сиригэр Култуура, Таатта улууһугар Айар Ситим сылларынан «Үрүҥ тунах оһуохайа» улуус баһылыгын бирииһигэр оһуохай этээччилэр күөн күрэстэрэ Саха АССР коммунальнай хаһаайыстыбатын бастакы наркома Андреев Ананий Кононович төрөөбүтэ 125 сылыгар ананар. Дьүүллүүр Сүбэҕэ оҕо, ыччат түһүлгэтигэр Саха Өрөспүүбүлүкэтин култууратын үтүөлээх үлэһитэ, Саха Сирин Дархан этээччитэ Попов Афанасий Николаевич, Саха Өрөспүүбүлүкэтин үөрэҕириитин туйгуна, Авксентий Егорович Мординов аатынан Таатта лицейын саха тылын уонна литературатын учуутала Андросова Оксана Прокопьевна, Саха Өрөспүүбүлүкэтин култууратын туйгуна, Өрөспүүбүлүкэтээҕи норуот айымньытын дьиэтин норуот айымньытын салаатын сэбиэдиссэйэ Пахомова Ираида Егоровна, улахан дьоҥҥо Российскай Федерация уопсай үөрэхтээһин бочуотунай үлэһитэ, Ананий Кононович Андреев аатынан олох-дьаһах коммунальнай хаһаайыстыба музейын сэбиэдиссэйэ Арылахова Галина Егоровна, Өрөспүүбүлүкэтээҕи норуот айымньытын дьиэтин норуот айымньытын салаатын исписиэдспециалиһэ Маркова Күннэй Семеновна, үөрэхтээһин эйгэтин бочуоттаах үлэһитэ, Таатта оһуохаын үйэтитээччи Аржаков Аграфена Ивановна үлэлээтилэр.
Куораттан ыҥырыылаах ыалдьыппыт Ираида Пахомова сахалар сиэр-туом силигин ситэрэн тутуһар, саха таҥаһын-сабын симэнэр култууратын билээччи, оһуохай үҥкүүтүн тургутааччы, куолас маанытын араарааччы, бэйэтин эйгэтин толору баһылыыра-билэрэ арылытык көстөр. Галина Арылахова тыл үөрэхтээҕэ буолан тылы-өһү, А.К.Андреев үлэтин үйэтиппит 4 кинигэ ааптара буолан тиэмэни арыйалларыгар сүрүн болҕомтотун уурда. Куолас чөллөркөйүн, түһүмэхтэринэн уларыйыытын, дорҕооннорун дуоратарын, кылыһаҕын кылыгыратарын иһиттэ. Хас биирдии хамсаныытынан, эргиири тутарынан, дьон сүргэтин көтөҕөрүн сыаналаата. Дьүүллүүр сүбэ састааба араас кэриҥнэринэн баал туруорара олус эппиэтинэстээх. Түмүккэ, ирдэбили тутуһан, сөптөөхтүк сыаналаан, Кылаан Чыпчаал кыайыылаахтарынан Дьохсоҕон нэһилиэгэ ааттаныан ааттанна. Улуус баһылыга Айаал Бурцев 100 тыһыынча сууммалаах туоһу суруга Дьохсоҕоҥҥо кыырайда. Саха Өрөспүүбүлүкэтин коммунальнай хаһаайыстыбатын унитарнай тэрилтэтэ 50 000 солк. Таатта нэһилиэгэр туттарыллынна, улуустааҕы норуот айымньытын дьиэтин бирииһэ 20 000 солк. Тыараһа нэһилиэгэр ананна, Алмазэргиэнбаан туруорбут 15 000 солк. Чөркөөхтөргө бэриллиннэ. Оһуохайга сүрүн күүһү кынаттар дьоно буолаллар. Бу да түһүлгэҕэ бастыҥ кыначчыт Чөркөөхтөн Туйаара Яковлева, бастыҥ кыначчыттарынан Дьохсоҕон оҕолоро ыллылар.
Үрдүкү үрүҥ Айыы күүһүттэн көҥүл ылан, алгыстаах түһүлгэттэн оһуохайы аан тылынан саҕалааччы, Үтүөлээх Дархан оһуохай этээччи Афанасий Попов дьүүллүүр сүбэ бэрэссэдээтэлэ оһуохай саҕаланыан инниттэн кыттааччыларга өйүн чөмчөкөтүн хаппаҕар хаһаана сыппакка, олус туһалаах тэттик сүбэлэрин, аҕалыы амарахтык алгыс тылынан амалыйда. Бу кини дьоһунун, муудараһын, Таатталыы тыыннаах киэҥ киэлитигэр ураты көрүүлээҕин бигэргэтэр. Өбүгэ саҕаттан олохтоммут төрүт үҥкүү оһуохайа дьону-сэргэни сомоҕолуур суолталааҕын үрдүктүк тутар. Дьүүллүүр Сүбэҕэ олорон, хас биирдии кыттааччы таһымын үрдэтэн, үчүгэйин бэлиэтээн, талаанын таһаарар сирэйин-хараҕын олоруутуттан, ойон тиийэн тэҥҥэ оһуохайдаһарыттан да арылхайдык көстөр. Оһуохай буола турар кэрэ бэлиэ сирин-уотун остуоруйатын сиһилии билэр эрэ буолбакка сэгэтэн сэһэргээн кэпсиирэ, кини төрөөбүт түөлбэтин ис сүрэҕиттэн таптыыра тылын тамаҕар таарыллан ааһар. Оһуохай түһүмэхтэрин тутуһуутугар, этэр тылын-өһүн уус ураныгар, тиэмэтин толору тиэрдэригэр, куолаһын кэрэтигэр, чуолкайыгар, чуоругар, таҥаһа-саба толору симэммитигэр тиийэ кыраҕытык кэтээн, чуумпуран олорон чуҥнаан, иһийэн туран иһиллээн, күөн күрэс кыттыылаахтарыгар күө-дьаа сэргэхтик сэгэлдьийэрэ сэҥээриини дириҥ ис хоһоонноон биэрэр. Таатталыы оһуохай көлүөнэттэн көлүөнэҕэ бэриллэр көстүбэт ситимин силбээн, силимнээн биэрэр таһыччы кыахтааҕын ситимин иитигэр иитиллэҕин, үүнэҕин-сайдаҕын. Эдэр ыччакка, оҕо-аймахха туһаайбыт тэтимнээх ньэгирэ үрдүккэ көтүтэр, сырдыкка талаһар, кэскиллээҕи кэҥэтэр. Манна сылдьыбыт эрэ барыта ис иһиттэн сырдаан, кута-сүрэ күүһүрэн, үтүөкэн эйгэлиин эҥээрдэстэ, дууһалыын чэпчээтэ.
Оһуохай түһүлгэтин иилээн-саҕалаан А.И.Софронов-Алампа аатынан норуот айымньытын дьиэтин, өрөспүүбүлүкэтээҕи оһуохайы тарҕатар айар экспериментальнай балаһааккатын үлэһиттэрэ ыыттылар.
Бириистэри туруорбут Саха Өрөспүүбүлүкэтин коммунальнай хаһаайыстыбатын унитарнай тэрилтэтэ генеральнай дириэктэригэр Чикачев В.С., Алмаасэргиэнбаан салайааччытыгар Аргунова М.Б. тэрийээччилэр ааттарыттан барҕа махталбытын тиэрдэбит.
@Сандаара 2026.21.06.
