МААСТАР САТАБЫЛЫН ҮӨРЭҔЭ ДЬОНУ-СЭРГЭНИ СЭҤЭЭРТЭ «ИИС.УУС.АС» этнография бэстибээлин биир дьоһун тэрээһининэн маастар сатабылын үөрэҕэ буолла. Ф.М. Охлопков аатынан култуура уонна сынньалаҥ пааркатыгар түөрт сиринэр маастар кылаас ыытылынна.
«ТУОЙ ТОЙУГА» СӨ уус уран оҥоһуктарын маастара, Тыараһа нэһилиэгин олохтооҕо УЛЬЯНА МАТВЕЕВА өбүгэбит түҥ былыргы дьарыгын сөргүтэр сыаллаах-соруктаах үөрэҕэ бэрт сэргэхтик ааста. Маастар үөрэнээччилэригэр билиитин-көрүүтүн, дьарыгын туһунан сэһэргии сэһэргии,күн устата ойон турбакка, 10 көһүйэ иһити, 10 көмүлүөгү айан таһаардылар. Ульяна Васильевна көмүлүөк моһуонун гончар станогар илбийэн таһаарбытын, салгыы үөрэнээччилэрэ быһан-отон, ойуулаан-дьарҕаалаан ситэрэн биэрдилэр. Бу көмүлүөгү маастар үөрэнээччилэригэр үрүҥ тунах ыһыаҕынан бэлэх быһыытынан ууммута икки бүк үөрүү буолла. Сорохтор хаһыс да сырыыларын маастар кылааска кыттар буоланнар, илиилэрэ бара үөрэнэн, буочардара өссө тупсубутун бэлиэтии көрдүлэр.
ЖИВОПИСЬ Россия худуоһунньуктарын сойууһун чилиэнэ, живописец, биир дойдулаахпыт СЕМЕН НУЧЕКАНОВ уруһуйга маастар кылааһын дойдутун дьонугар-сэргэтигэр сылын аайы кэлэн ыытар. Сүрэҕи үөрдэр, харах хайҕыы көрөр кэрэ ойуулар айыллан таҕыстылар.
ТАБА МУОҺУТТАН КИЭРГЭЛ СӨ уус уран оҥоһук маастара, Анаабыр улууһун олохтооҕо, Долган омук ассоциациятыттан ДИАНА СПИРИДОНОВА олус сонун маастар кылааһы ыытта. Таба муоһун хаптаҕай гына эрбээн,аалан эрдэттэн бэлэмнээн, ону кустук өҥнөөх дьэрэкээн оҕуруонан иилэн Таатта далбар хотуттара харахтара халтарыйда, дууһалара манньыйда.
БАЛЫК ХАТЫРЫГЫТТАН УОННА УҤУОҔУТТАН КИЭРГЭЛ СӨ уус уран оҥоһуктарын маастара, Дьүкээгир омук ассоциациятыттан ЕЛЕНА ВОРОНЦОВА киһи сөҕүөх эрэ кэрэ симэҕи оҥоттордо. Өрүс балыгын көмүс хатырыга араас быһыылаах моойго кэтэр киэргэлгэ бэртээхэй матырыйаал буолар эбит. Ону аттаран, тутан-хабан маастар сатабыллаах илиитинэн сонун, сиэдэрэй киэргэли оҥорон таһаарарын сэргии көрдүлэр
ЧОҔУНАН МЭТИРИЭТ Саха сирин худуоһунньуктарын сойууһун чилиэнэ, Дьүкээгир омугун ассоциациятыттан ЕКАТЕРИНА СУРЖАНИНОВА чоҕунан тутатына мэтириэккин уруһуйдаан биэрдэ. Остуолга тэлгэммит мэтириэттэртэн киһи көрөн билэр ньуурдарын булуохха сөп. Ити курдук төрүт үгэс үөрүйэхтэрин баһылаабыт маастардар күрэстэрин сатабыл үөрэҕэ ситэрэн-хоторон биэрдэ. Маастары илэ тутан олорон үөрэнэн, кистэлэҥ үөрүйэхтэрин быыһын сэгэтэн көрөн, дьиэлэригэр бэйэ оҥоһугун дьоһуннана тутан барбыт дьоллоох саха бүгүн үксээтэ
