Тыйаатыр – үөрүү….
Тыйаатыр – иэйии….
Тыйаатыр – кэрэ…
Тыйаатыр – кэпсээн…
Тыйаатыр – түгэн…
Ыам ыйын 16 күнүгэр Улуустааҕы норуот айымньытын дьиэтигэр “Тыйаатыр аптаах эйгэтэ оҕолорго” улуус оскуолаларын театральнай студияларын түмэр туйгун тэрээһин кыттыылаахтара, тыйаатыр кэрэ эйгэтин сэҥээрээччилэр, алыптаах, аптаах түгэҥҥэ умсугуйааччылар доҕордоһуу түһүлгэтигэр муһуннулар.
Тыйаатыр уонна ускуустуба – киһи духуобунай баайын сайдыыта. Аан дойду устуоруйатын, култууратын кэрэһэлиир биир сүрүн хайысха. Тыйаатыр — дьону түмэр суолталаах, киһи хараҕынан көрбөт олох-дьаһах кистэлэҥин көрдөрөн үөрэтэр, өйү-санааны кэҥэтэр, дириҥэтэр.Тыйаатыр тыыннаах ускуустуба буолан көрөөччүгэ олус чугас. Дьиҥнээх эмоцияны киһи бу илэ-бааччы тыйаатырга эрэ көрөр.
Оҕо театрга сыһыннаҕына айар дьоҕура уһуктар. Испэктээккэ кыттыннахтарына арыллан, олоҕу көрүүлэрэ кэҥээн, ырытар дьоҕурдара сайдар.
Бу үөрүүлээх айар түһүлгэҕэ улуустааҕы норуот айымньытын дьиэтин директора Изабелла Сивцева эҕэрдэтин тиэртэ, кырачаан артыыстарга ситиһиини баҕарда.
“Тыйаатыр аптаах эйгэтэ оҕолорго” күрэс уратытынан, үрдүк сценаҕа уһуйааччы уонна уһуйуллааччы хомоҕой хоһоон хонуутугар бииргэ уус – уран ааҕыылаара буолла. Күрэс үс түһүмэҕинэн ыытылынна: бастакы түһүмэххэ сатабылларын, оскуолаларын иһигэр бэлэмнэниилэрин, дьарыктарын кэмин тэттик видеоҕа устуу. Иккискэ үрдүк сценаҕа арыллан бэйэни билиһиннэрии түһүмэҕэ, үсүһүнэн талбыт айымньыларын салайааччы иитиллээччилэринээн бииргэ уус – уран ааҕыы, дьүһүйүү.
Бу тэрээһини, оҕолор үлэлэрин сыаналаатылар: Мира Николаевна Луковцева — Таатта улууһун үөрэҕириитин салаатын методическай киинин сэбиэдэссэйэ, Дайаана Борисовна Жерготова — Таатта улууһугар Бүтүн Арассыыйатааҕы Бастыҥнар хамсааһыннарын олохтоох отделениетын исписэлииһэ, Галина Александровна Павлова -«Туллукчаан» оҕо библиотекатын үлэһитэ
Ол курдук, кэрэ эйгэҕэ кыттыстылар: Авксентий Егорович Мординов аатынан Тааттатааҕы лицейыттан «Умсулҕан» (сал. Оксана Прокопьевна Андросова, Саргылана Дмитриевна Турнина, Галина Иннокентьевна Федорова), Тыараһатааҕы коррекционнай оскуолатыттан «Ача» (сал. Лазарева Александра Николаевна), Авксентий Егорович Мординов аатынан Тааттатааҕы лицей 3 а кылааһыттан «Кустукчаан» (сал. Кузьмина Марианна Семеновна), Иннокентий Михайлович Хатылаев аатынан Баайаҕа орто оскуолатыттан “Сулус” ( сал. Жиркова Саргылана Васильевна, Тимофеева Фекла Михайловна, Аввакумова Анна Яковлевна), Владимир Ильич Ленин аатынан Уолба орто оскуолатыттан «Ай – талаан» (сал. Рахлеева Саинна Иннокентьевна), Хрисанф Иванович Кашкин аатынан Даайа – Амма орто оскуолатын «Эгэлгэ», (сал. Татьяна Анатольевна Поскачина), Эдуард Карлович Пекарскай аатынан Игидэй орто оскуолатыттан “Сыдьаай” (сал. Попова Сардаана Дмитриевна, Максимова Светлана Ильинична), Алексей Елисеевич Кулаковскай – Өксөкүлээх Өлөксөй аатынан Дьохсоҕон орто оскуолатыттан “Кэскил” (сал. Елена Егоровна Попова,Лариса Михайловна Саввина,Мария Владимировна Сивцева) театральнай студиялар.
Оҕолор бары ох курдук оҥостон кэлбиттэрэ үөрдэр. Күрэс кыайыылаахтарынан Тааттатааҕы лицей 3 а кылааһыттан «Кустукчаан» (сал. Кузьмина Марианна Семеновна) таҕыстылар.
Үйэлэри ситимниир алыптаах тыйаатыр сайда турдун!
Таайтарыылаах талааннар тахса турдуннар!
Ситиһиилээх сайдар саҕахтар салалынныннар!
Истиҥ көрөөччүлэр махталлара уҕараабатын!
Татьяна Захарова
