Үс күн устата Саха НКиХ ханаалыгар көстүбүт Саха АССР үтүөлээх артыыһа, РФ култууратын үтүөлээх үлэһитэ, ЫТЫК алгысчыт Афанасий Семенович Федоров төрөөбүтэ 85 сааһыгар аналлаах «АЛГЫСТААХ ТОЙУК» сиэр-туом олуктара өрөспүүбүлүктээҕи күрэҕэ дьэ түмүктэннэ! 4 түмүктүүр түһүмэххэ эгил-тэгил үктэнэн, илин-кэлин түсүһэн 5 кылыгырас кылыһахтаах, хомуһуннаах тыллаах, уһун тыыннаах тойуксуттар сиэр-туом тойуктарын толорон күөн көрүстүлэр. Тойуксуттар дьиэлэригэр бэлэмнэнэн кэлбит сорудахтарын сиэр-туом алгыһын тойугун туойдулар: Салама ыйааһына, кымыс иһиитэ, дьиэ малааһына, уруу алгыһа, муҥха алгыһа. Биир дойдулаахпыт Иван Ивановка муҥха алгыһын сиэрин-туомун тойуга түбэспитин толордо. Дьэбэрэ тэллэх, Бырыы сыттык, Көппөх суорҕан, Туона баай, Күөх далай иччитэ Күөх боллох оҕонньорго үҥэн-сүктэн көрдөһөн, үс саастаах кунан оҕус хабаҕар ынах арыытын кутан ойбоҥҥо түһэрэрин, күөл кытыытыгар атаҕа суоруллубут титириги анньан, онно кус, көтөр кынатын, атаҕын, куобах чөмчөкөтүн ситиигэ иилбит дэлбиргэтин оҥорон ыйаан, биир түмүгүн суораттаах иһиккэ, атын түмүгүн ойбоҥҥо уган Баай Барыылаах Байанайы уонна Күөх далай иччитэ Күөх Боллох оҕонньору ситимниирин туһунан этэн-тыынан сиэри ситэрдэ, туому толордо. Дьүүллүүр сүбэ муҥха алгыһын сиэрэ-туома ситтэ-хотто, толору көһүннэ, муҥхаҕа сылдьардыы сананныбыт диэн үрдүктүк сыаналаатылар. Санатан эттэххэ, дьүүллүүр сүбэҕэ Афанасий Семеновиһы сэргэ фольклорист Лена Егорова, «Күн дьоно» этно-фольклор бөлөҕүн салайааччыта Евдокия Кондратьева, Култуура уонна искусство колледжын уһуйааччылар Роман Габышев, Михаил Винокуров үлэлээтилэр. Түмүккэ, ✨ «КЫЛЫГЫРАС КЫЛЫҺАХ» анал аат — Наталия Сивцева (Сунтаар, Дьаархан); ✨»СИЭРИ-ТУОМУ ТОЛОРУУ ЭГЭЛГЭЛЭЭХ ТОЙУКСУТ» анал аат — Антонина Алексеева (Дьокуускай к.); ✨ «ХОМУҺУННААХ ТЫЛЛААХ ТОЙУКСУТ» анал аат — Надежда Дмитриева (Нам, Түбэ); ✨ «УҺУН ТЫЫННААХ ТОЙУКСУТ» анал аат — Лидия Харитонова (Хаҥалас, Покровск) ✨КЫЛААН КЫАЙЫЫЛААХ ИВАН ИВАНОВ (Таатта, Ытык Күөл) Биир дойдулаахпытын Иван Иванову тохтор тойук улахан түһүлгэтигэр улахан ситиһиитинэн эҕэрдэлиибит! Өбүгэлэрбит тыһыынчанан хаалларбыт сүдү баайдарын, алгыстарын, сиэрдэрин-туомнарын, тойуктарын көрдөрөр «АЛГЫСТААХ ТОЙУК» сонун бырайыагы дьон-сэргэ сөбүлээн сэҥээрэн көрдө. Үкэр күөх сайыҥҥа үктэнэрбит чугаһаабытынан Айыыларбытыгар чугаһыы, сиэри-туому үөрэтэ, тутуһа сылдьыаҕыҥ, сирдээҕи олохпутун киэргэтиэҕиҥ. Алгыһынан кынаттана сылдьар киһи кыайыа да суоҕун кыайар, сорунуо да суоҕар ылсар, эбээт!
