Бүгүн Орто Амма нэһилиэгин И.В.Николаев аатынан норуот айымньытын дьиэтигэр Саха сиригэр Култуура, Таатта улууһугар Айар Ситим сылларыгар аналлаах, Таатта улууһун норуот айымньытын дьиэтин үлэһиттэрин кытта көрсүһүү буолла.
Көрсүһүү маннык дириҥ ис хоһоонноох хайысхаларынан тосхоллонон барда.
А.Е.КУЛАКОВСКАЙ ТӨРӨӨБҮТЭ 150 СЫЛЫГАР «САЙЫН КЭЛИИТЭ» ПОЭМАТЫНАН ЫҺЫАХХА БЭЛЭМНЭНИИ;
«ҮЙЭЛЭЭХ СИТИМ ТЫЫННААХ ЭЙГЭТЭ» ТААТТА УЛУУҺУН УЛУУ БЫЛААНЫН БИЛИҺИННЭРИИ;
МАНДАР УУС ФИЛОСОФСКАЙ ОЙУУЛАРЫН СЭҺЭНЭ. Көрсүһүү биһиги улууспут духовнай лидеригэр, улууспут култууратын салайааччы Изабелла Александровна Сивцеваҕа саха норуотун сээркээн сэһэнньитэ Н.Е.Мординов-Амма Аччыгыйа төрөөбүтэ 120 сылынан «Бэлэм буол!» хаһыакка бииргэ үлэлээбит коллегалара анаан оҥотторбут дьоһун бэлиэлэрин туттарыынан саҕаланна. Изабелла Александровна Амма Аччыгыйын олоҕун, айар үлэтин үйэтитиигэ өр сылларга Харбалаах оскуолатын кытта сүбэ-соргу буолан үлэлэспитин иһин махтал бэлиэнэн наҕараадаланна. «ҮЙЭЛЭЭХ СИТИМ ТЫЫННААХ ЭЙГЭТЭ» ТААТТА УЛУУҺУН УЛУУ БЫЛААНЫН Изабелла Александровна сиһилии быһааран кэпсээтэ. Истибит дьон сэҥээрбиттэрин туһунан санааларын эттилэр, Тааттаттан улуу дьоммут өйдөрүгэр-санааларыгар тирэҕирэн, маннык дириҥ ис хоһоонноох былаан ылыныллыбытыттан астыналларын биллэрдилэр, онно үлэлэспит дьоҥҥо махтаннылар. Салгыы А.Е.КУЛАКОВСКАЙ ТӨРӨӨБҮТЭ 150 СЫЛЫГАР «САЙЫН КЭЛИИТЭ» ПОЭМАТЫНАН ЫҺЫАХХА БЭЛЭМНЭНИИ тула кэпсэтии буолла. Онтон МАНДАР УУС ФИЛОСОФСКАЙ ОЙУУЛАРЫН СЭҺЭНЭ туһунан кэлии ыалдьыттарбыт А.П. Боппосова, Я.А.Никифорова уонна олохтоохтор кыттыылаах сүрдээх үчүгэй анаарыы кэпсэтии буолла. Онон бүгүн Харбалаахха олус дириҥ ис хоһоонноох тэрээһин кыттыспыт дьону кэскили түстүүргэ толкуйга түһэрдэ, айымньылаах үлэҕэ кынаттаата. Валентина Кривошапкина,Харбалаах. @taattagazeta