От ыйын 9-11 күннэригэр Ф.Охлопков аатынан сынньалаҥ пааркатыгар күрэс төрүт көрүҥнэрин XXII Манчаары оонньууларын чэрчитинэн бастакытын оскуолаҕа киириэн иннинээҕи саастаах уонна алын үһүөх кылаас оҕолоругар аналлаах «Оҕо саас кырдала» оҕо, дьиэ-кэргэн чөл олохтоох буолалларыгар, өбүгэ хамсаныылаах оонньууларын билиһиннэрэр сыаллаах оонньуу түһүлгэтэ тэриллиннэ. Эрдэттэн былааннанан улуустааҕы норуот айымньытын дьиэтэ, «Арылы кустук» үөрэхтээһин уопсастыбаннай ситимэ «Модун» спортивнай киини кытта үлэни ыытан,Манчаары оонньууларын култуурунай торумугар киллэрбиттэрэ.»Арылы кустук» ситимҥэ улууска 9 уһуйааннара холбоһон 12 сыл устата оҕолору олоҥхо педагогикатыгар үөрэтэр уһуйааннар буолаллар. Бу күҥҥэ Таатта нэһилиэгин «Сулусчаан», «Чуораанчык», «Кэнчээри», Харбалаахтааҕы «Кэскил» , Чөркөөхтөөҕү «Аленушка», Дьохсоҕоннооҕу «Мичил» , Тыараһатааҕы «Сардаана», Уус-Тааттатааҕы «Харыйачаан», Чымнаайытааҕы «Сардаана» уһуйааннара бэйэлэрэ айбыт оонньууларынан үс күн устата оҕо-аймаҕы тоҕуоруһа муста. Төһө да ардахтаах күннэр турдаллар төрөппүттэр оҕолорун сиэтэн Манчаары оонньууларын бэлиэлэрэ Талах Бэргэн, Кэрэ Кытыл, Тоттооной Оҕусчаан сымсатык хамсаныылаах, өй-санаа оонньууларын тэрийдилэр.
Күрэххэ кыттыбыт оҕолорго «Модун» спортивнай киин туруорбут сувенирдар бириистэри туттулар.
