ИЛИН ЭҤЭР УЛУУСТАР ОҺУОХАЙДАРЫН ТҮҺҮЛГЭТИГЭР ТААТТАЛАР БАСТААТЫЛАР
Ыам ыйын 24 күнүгэр Мэҥэ хаҥалас улууһун Аллараа Бэстээҕэр сылын аайы ыытыллар XIII төгүлүн Г.Г.Колесов аатынан Олоҥхо дьиэтэ “Күн үҥкүүтэ” Илин эҥэр түөлбэ оһуохайын күөн-күрэһин ыытта. Быйыл Улуу Кыайыы 80 сылынан дириҥ суолталаах улахан тэрээһин ыытыллынна. Өлүөнэ Эбэ кытылыгар биэс улуус бастыҥ оһуохайдьыттарын түһүлгэтэ Дархан алгысчыт П.М.Тихонов алгыһынан саҕаланна. Мэҥэ Хаҥалас улууһун баһылыга Д.И.Тихонов бу саха буойун саллааттара Ийэ дойдуларын көмүскүү барбыт ытык сирдэригэр сүгүрүйүү ытык күнүн бэлиэтээтэ. Амма, Чурапчы, Уус Алдан салайааччылара, Таатта улууһуттан улуус баһылыгын солбуйааччыта С.В. Сунхалыров улуус историятыттан сырдатан, киэҥ түһүлгэлээх оһуохай кыттааччыларыгар эҕэрдэ тылларын тиэртилэр.
Ол кэннэ Мэҥэттэн төрүттээх СӨ норуодунай артыыһа, талааннаах ырыа айааччы Анастасия Варламова-Эдьиий Настаа сэрии хорсун буойуттарыгар анаан хаалларбыт «Туос тууйастар» ырыатынан доҕуһуоллатан хас биирдии улуустан кэлбит делегация Өлүөнэ Эбэҕэ тууйастары ыыттылар.
Тэрээһин сүрүн чааһыгар Кыайыы болуоссатыгар биэс улуус саллааттарыгар анаммыт мэҥэ бэлиэҕэ сибэкки дьөрбөтүн уурдулар.
«Күн үкҥүүтэ» үс бөлөҕүнэн ыытыллынна. Дьүүллүүр сүбэҕэ уопсайа 66 этээччини өрөспүүбүлүкэҕэ биллэр оһуохайы үөрэппит, чинчийбит С.П.Толстякова, В.А Степанова.-Арчыына, Дархан оһуохай этээччилэр, улуустартан оһуохай түмсүүлэриттэн биирдии киһи киирэн сыаналаатылар. Таататтан Россия суруналыыстарын чилиэнэ, «Саха» НКИХ Тааттатааҕы филиалын редактора, улуус П.Ф.Татаринова үлэлээтэ.
Түмүккэ оҕолорго 31 этээччиттэн
БАСТАКЫ ҮРДЭЛ- Алена Колодезникова, Уус-Таатта. Сал.А.Е.Васильева. Бирииһэ 5000 солк.
«Кэрэ куолас» анал аат – Симона Макарова, Дьохсоҕон. Сал. Е.Е.Попова, А.Н.Попов. Бирииһэ 3000 солк.
Дархан этээччи Денис Оконешников анал бирииһэ- Дарияна Бурцева, Харбалаах. Сал. А.Н. Быгынанов. Бирииһэ үрүҥ көмүс ытарҕа.
Ыччат бөлөҕөр 14 кыттааччы
БАСТАКЫ ҮРДЭЛ- Айта Васильева, Уус Таатта. Бирииһэ 10000 солк.
ҮҺҮС ҮРДЭЛ- Иван Иванов, Ытык Күөл. Бирииһэ 5000 солк.
Улахан дьон бөлөҕөр 21 ыттааччы
БАСТАКЫ ҮРДЭЛ- Афанасий Попов, Дьохсоҕон. Бирииһэ 10000 солк.
Быйылгы оһуохай түһүлгэтэ уратыта улуустар бириискэ 30 000 солк. харчынан кыттыһан туруордулар. Бирииһи Улуустааҕы норуот айымньытын дьиэтэ (директор Г.Г.Вырдылин ) туруорда.
Түһүлгэ түмүк тэрээһинигэр Саха сиригэр оһуохай күнүнэн эҕэрдэлээн Культура министрэ А.И.Ноев кыттыыны ылла. Улуус талба таланнаахтарын кэнсиэригэр Таатта Күөрэгэйэ Анна Обоюкина, Мария Сабарйкина, Харбалаахтааҕы «Сыккыс» фольклорнай бөлөҕө ырыаларынан-тойуктарынан тиэртилэр.
Сыанаҕа түмсүү салайааччылар тахсан сэрэбиэй ыытыллан эһиилги түһүлгэ Айыыһыт алҕаабыт алгыстаах Амма сиригэр ыытыллар буолла.
Тааттабыт аатын ааттатар киэҥ түһүлгэҕэ кыттыыны ыларбытыгар көмөлөспүт салайааччыларбытыгар Таатта улууһуттан улуус баһылыгын солбуйааччыта С.В.Сунхалыровка, улуустааҕы норуот айымньытын директорыгар Г.Г.Вырдылиҥҥа, Орто-Амма нэһилиэгин баһылыгар А.И.Кулачиковка, туос маастардарыгар, П.А.Ойуунускай аатынан Чөркөөх орто оскуолатын директорыгар Е.В.Лебедевка, төрөппүттэргэ, норуот айымньытын дьиэтин үлэһиттэригэр, сымнаҕас айаннаах суоппардарбытыгар С.Н. Огонеровка, Е.М. Николаевка барҕа махталбытын тиэрдэбит.
Айхалланнын- саргылаах оһуохай!
Уруйданнын- уйгулаах оһуохай!
Алгыстаннын- арчылаах оһуохай!
Тускулланнын-түһүлгэлээх оһуохай!
