Саха төрүт көрүҥнэригэр XXII-с “Манчаары оонньуулара” буолара 50 күн хаалбыт күнүгэр, Ытык-Күөл “Алгыс” балаҕаныгар олус долгутуулаах бэлиэ түгэн буолла. Таатта улууһун норуот айымньытын дьиэтин көҕүлээһининэн Екатерина Игнатьевна Бурнашева салайааччылаах “Айылҕаана” эбээлэр түмсүүлэрэ буолаары турар “Манчаары оонньууларыгар” анаан дьоһун бэлэҕи утары уунна. Бу сылгы кылыттан “Тойон сөрүө” технологиянан оҥоһуллубут 171 см үрдүктээх, 89 см туоралаах, 530 миэтэрэ хатыллыбыт ситиинэн оҥоһуллубут панно буолар. Манна “Оонньуулар” 11 көрүҥнэрин пиктограммаларын маҥан олбоххо хара сиэлинэн баттах курдук өрөн ойуулаабыттар. Бу ойуулар хонуулара үөһээ-аллараа үстүү бүтэй күрүөлээх. Панно үөһээ өттө Таатта талаҕыттан оҥоһуллубут, үрдүгэр үс Дьөһөгөй оҕото, икки кытыыларыгар маҥан дэйбиирдэр, панно аллараа өттүгэр хара, маҥан, кугас сиэлинэн Салгын Кут, Ийэ Кут, Буор кут бэлиэлэрэ бааллар.
Панно уруһуйа (пиктограммалар) худуоһунньук П.С. Доргуев эскииһинэн оҥоһуллубут. Кылынан өрүү технологиятыгар Туора-Күөлтэн норуот маастара В.Н.Потапова кэлэн көрдөрөн, сүбэлээн үөрэппит. Туорай маһын оҥорорго Алгыстаана Сырдык Ай салайааччылаах “Сатабыл” оҕону сайыннарар киин күүс-көмө буолбут. Бу оҥоһук эбээлэр этэллэринэн сырдыгы сыдьаайар, арчылыыр, харыстыыр аналлаах.
Дьэ бу сөҕүмэр, мындыр дириҥ ис хоһоонноох уус-уран оҥоһугу 14-с сылын үлэлиир “Айылҕаана” түмсүү 60-н 89 дылы саастаах 35 ыал эбээлэрэ, айыы санаалаах Далбар Хотуттар имигэс илиилэринэн имэрийэн, сүрэхтэрин сылааһынан угуттаан сылтан ордук кэмҥэ оҥордулар. Эбэн эттэххэ, туһаныллыбыт сиэлгэ эбии икки сыллааҕыта Өймөкөөн улууһугар ыытыллыбыт Олоҥхо ыһыаҕар Таатта култууратын үлэһиттэрэ Моҕол ураһа аһыллыытын сиэрин-туомун ыыппыттара, онно махтанан Өймөкөөттөр икки куул сиэли бэлэхтээбиттэрэ туһанылынна.
Бу бэлиэ тэрээһиҥҥэ улууспут аҕа баһылыга А.С.Бурцев, баһылыгы социальнай боппуруостарга солбуйааччы С.В.Сунхалыров, Таатта нэһилиэгин баһылыга Е.И.Павлов, Улуустааҕы норуот айымньытын дьиэтин дириэктэрэ Г.Г.Вырдылин, Былатыан Ойуунускай аатынан Таатта норуодунай тыйаатырын режиссера В.Ф.Бурнашева, улуус дьахталларын сэбиэтин бэрэссэдээтэлэ В.И. Будикина, улуустааҕы спорткомитеттан Н.Н.Власов эҕэрдэ тылы эттилэр, дириҥ махталларын тиэртилэр. Бу дьоһун бэлэх саҥа тутуллубут А.Е.Турнин аатынан спорт уораҕайыгар саамай көстүүлээх сиргэ ыйаныаҕа.
#Таатта#Манчаарыоонньуулара#иис#норуоткүүһэкөмүөлкүүһэ
@taattagazeta
@taatta_kultura
