Төрөөбүт дойдубутугар эйэлээх олох кэлэригэр олохторун, сырдык тыыннарын толук уурбут хорсун саллааттары, сут-кураан аччык сылларыгар үлэ фронугар үлэлээбит тыыл бэтэрээннэрин, оҕо сааһы билбэтэх сэрии кэмин оҕолорун ахтан-санаан ааһар, чиэстиир үтүө күнү култуура салаатыгар үлэлээбит ытык дьоммутугар-бэтэрээннэрбитигэр анаан ыам ыйын 6 күнүгэр култуура үлэһиттэрин улуустааҕы идэлээх сойуустарын комитета тэрийэн ыытта. Бүгүн улуус үрдүнэн култуура салаатыгар үлэлээбит 2 тыыл бэтэрээнэ, 14 сэрии кэмин оҕолоро чугас дьоннорун өйөбүллэринэн, тапталларынан чэгиэнник олороллор, сэмэй кылааттарынан олохпут сайдыытыгар кыттыһаллар.
Бу күн кэлбит ытык дьоммутун Улуустааҕы норуот айымньытын дьиэтин салайааччыта Гаврил Вырдылин, Ытык-Күөллээҕи литература түмэлин профсоюһун бэрэссэдээтэлэ Мария Туласынова, улуус бэтэрээннэрин сэбиэтин бэрэссэдээтэлэ Маргарита Попова массыынаҕа олордон арыаллаан нэһилиэкпитигэр тутулла турар саҥа объектарынан; Ф.Охлопков аатынан сынньалаҥ пааркатыгар, Таатта улууһугар күрэс төрүт көрүҥнэригэр ХХII төгүлүн ыытыллар Манчаары оонньуулара ыытыллыахтаах саҥа стадиоҥҥа, спорт дыбарыаһыгар, саҥардыллыбыт Кыайыы болуоссатыгар сырытыннардылар, ыытыллар үлэлэри, былааннары билиһиннэрдилэр. Ол кэнниттэн бэтэрээннэри «Алгыс” балаҕаҥҥа Ф.С. Аргунов аатынан Ытык-Күөллээҕи оҕо искусство оскуолатын уһуйааччыларын инструментальнай ансаамбыла (дириэктэр Дария Попова, ансамбль салайааччыта Александр Павлов) улуу кыайыы ырыаларынан уруйдуу көрүстүлэр. Ытыктыыр дьоммут итии чэйдээх, сылаас астаах, арыылаах саламааттаах сандалы тула олорон уруккуну санастылар, олоххо көрүүлэрин үллэһиннилэр. Эҕэрдэ тылларын култуура үлэһиттэрин улуустааҕы идэлээх сойуустарын комитететын бэрэссэдээтэлэ Раиса Петрова, Улуустааҕы норуот айымньытын дьиэтин салайааччыта Гаврил Вырдылин, улуус бэтэрээннэрин сэбиэтин бэрэссэдээтэлэ Маргарита Попова тиэртилэр. Улуу Кыайыы 80 сылынан хас биирдии бэтэрээн үбүлүөйдээх түөскэ кэтиллэр бэлиэни, бэлэхтэри, култуура үлэһиттэрин идэлээх сойуустарын өрөспүүбүлүкэтээҕи комитетыттан 5.000 солк. туттулар. Сылаас көрсүһүүнү эдэр саас ырыаларынан педагогическай үлэ бэтэрээнэ Илларион Сидоров , СӨ култууратын үтүөлээх үлэһитэ Карл Христофоров, уус-уран самодеятельность кыттыылааҕа, кыайыы ырыаларын тарҕатааччы Георгий Матаннанов, ураты талааннаах Петр Башарин киэргэттилэр. Хас биирдии ытык бэтэрээммит бу күнү үтүө өйдөбүл гына илдьэ сылдьарыгар үлэлэспит, көмөлөспүт дьоммутугар-профсоюз бэрэссэдээтэллэригэр, аҕам саастаахтар хордарын салайааччытыгар Христофоров К. И., Таатта нэһилиэгин сынньалаҥ киинин дириэктэригэр Тарасов А. И., суоппар Петров В. Д. махталбытын тириэрдэбит.
Ким да умнуллубат, туох да умнуллубат. Үрдүбүтүгэр эйэлээх халлаан күнэ чаҕылыйа тыктын.