Ыам ыйын 6 күнүгэр Таатта улууһун килбэйэр киинигэр Улуу Кыайыы 80 сылыгар аналлаах «СҮГҮРҮЙЭБИТ УЛУУ КЫАЙЫЫНЫ УҺАНСЫБЫТТАРГА!» ыччаттарга аналлаах улуустааҕы оһуохай этээччилэрин күөн-күрэһин Таатта улууһун дьиэ-кэргэн уонна ыччат политикатын салаата, улуустааҕы норуот айымньытын дьиэтэ, Таатта улууһун оһуохай түмсүүтэ, өрөспүүбүлүкэҕэ 5 оһуохайга экспериментальнай балассааккаҕа киирбит А.И.Софронов-Алампа аатынан Дьохсоҕоннооҕу норуот айымньытын дьиэтин үлэһиттэрэ иилээн-саҕалаан ыыттылар.
Оһуохай түһүлгэтин саҕаланыытыгар Таатта улууһун дьиэ-кэргэн уонна ыччат политикатын салаатын салайааччыта Варвара Петровна Рахлеева эҕэрдэ тылынан, чуор куоластаах Паша Харайданова ыллам ырыатынан саҕаланна.
Күөн-күрэскэ улуус 6 нэһилиэгиттэн 10 ыччат Улуу Кыайыыны уһансыбыт аҕа саастаах көлүөнэҕэ сүгүрүйэн, түөлбэ араас оһуохайын этэн дьүүллүүр сүбэ быһаарыытынан бастыҥнар ааттаннылар.
Дьүүллүүр сүбэҕэ Саха Өрөспүүбүлүкэтин култууратын үтүөлээх үлэһитэ, Үтүөлээх Оһуохай этээччитэ Афанасий Николаевич Попов, А.Е.Мординов аатынан Таатта лиссиэйин саха тылын уонна литературатын учуутала, Саха Өрөспүүбүлүкэтин үөрэҕириитин туйгуна Оксана Прокопьевна Андросова, Таатта оһуохайын тарҕатааччы, Саха Өрөспүүбүлүкэтин үөрэҕириитин туйгуна Аграфена Ивановна Аржакова ыччат дьоммут этэр тылларын ис хоһоонун, таба арыйыыларын, тутулун, тэтимин тутуһууларын, куоластара кэрэтин сыаналаатылар.
Түмүккэ:
• I Үрдэл Туйаара Яковлева, Чөркөөх
• II Үрдэл Алексей Аржаков, Уолба
• III Үрдэл Айта Васильева, Уус-Таатта
• «Түөлбэ оһуохайын тутуһааччы» анал аат Илья Наумов, Дьохсоҕон
• «Эҥээркэй куоластаах этээччи» анал аат Иван Иванов, Ытык-Күөл
• «Уус тыллаах оһуйааччы» анал аат Айтал Семенов, Уолба
• «Бастыҥ кыначчыт» анал аат А.Е.Кулаковскай аатынан Дьохсоҕон орто оскуолатын үөрэнээччитэ Паша Харайданова ааттаннылар.
Ыам ыйын 24 күнүгэр Дьокуускай куоракка ыытыллар өрөспүүбүлүкэтээҕи “Куйаар далай түһүлгэ” ыччат оһуохай этээччилэрин күрэҕэр сүүмэрдэнэн «Идэтийбит этээччилэр» бөлөххө Саха сирин оһуохайын Үтүөлээх этээччилэрэ Иван Иванов, Илья Наумов, «Саҥа саҕалааччы этээччилэр» бөлөххө Туйаара Яковлева, Айта Васильева кыттар чиэскэ тигистилэр.
Хас биирдии кыттааччыга дьүүллүүр сүбэ сүбэ-ама биэрдилэр, инникитин да маннык көхтөөхтүк кыттан, оһуохай түөлбэ арааһын баһылаан тапталлаах Тааттабытын ааттата туралларыгар баҕа санааларын тиэртилэр.
