Ил Дархан Айсен Сергеевич Николаев 2023-2027 сс. саха литературатын төрүттээччитэ, бөлүһүөк Алексей Елисеевич Кулаковскай — Өксөкүлээх Өлөксөй биэс сылын биллэрбитэ. Кулун тутар 16 күнүгэр Өксөкүлээх Өлөксөй төрөөбүт күнэ.
Бүгүн «Таатта» литературнай-художественнай түмэлигэр (Хадаайы) Өксөкүлээх Өлөксөй балаҕанын көмүлүөк оһоҕуттан Өрөспүүбүлүкэ үрдүнэн көстөр быһа холбонуунан https://vk.com/wall-217249400_4824 «Өксөкүлээх сардаҥата» уоту ылыы тэрээһинэ ыытылынна. Таатта улууһун баһылыгын эбээһинэһин толорооччу Руслан Игнатьевич Захаров, Өксөкүлээх Өлөксөй сиэнэ, РФ үөрэҕириитин туйгуна, СӨ үөрэҕириитин бочуоттаах бэтэрээнэ, Таатта улууһун бочуоттаах олохтооҕо Рива Реасовна Кулаковская Өксөкүлээх сардаҥатын Саха сиригэр сандаарытта. Салгыы А.Е.Кулаковскай-Өксөкүлээх Өлөксөй скверыгар ыраахтан-чугастан үөрэнээччилэр, тэрилтэлэр салайааччылара, Таатта улууһун дьаһалтата, Томпо улууһуттан үөрэҕирии үлэһиттэрин бөлөҕө кэлэннэр Сүгүрүйүү миитинигэр кытыннылар.
Улуу убайбыт сырдык аатыгар сүгүрүйэн, кини норуотугар анаабыт олоҕун туһунан санаан, ахтан, улууспут аҕа баһылыгын эбээһинэһин толорор Руслан Игнатьевич Захаров, Өксөкүлээх Өлөксөй сиэнэ Рива Реасовна Кулаковская кэс тылларын мустубут дьон сүргэлэрэ көтөҕүллэн туран иһиттилэр. Былатыан Ойуунускай аатынан Таатта народнай театрыгар “Кулаковский путь в вечность мастер” киинэ көрдөрүүтэ, Рива Реасовна Кулаковскаяны кытары көрсүһүү тэрилиннэ.
