Кулун тутар 1 күнүгэр Ытык-Күөлгэ Ф.С.Аргунов аатынан Тааттатааҕы оҕо искусство оскуолатын хореография отделениетын тэрийиитинэн, өрөспүүбүлүкэтээҕи «Кыайыы вальса» фестиваль-күрэс чэрчитинэн, улуус үөрэнээччилэрин икки ардыларыгар «Үҥкүүлүүр Таатта-2025» бальнай үҥкүүлэри толорооччуларга фестиваль- күрэс буолан ааста.
Күрэхтэһиигэ Харбалаахтан, Уус-Тааттаттан, Дэбдиргэттэн, Туора-Күөлтэн, Чөркөөхтөн, 1 нүөмэрдээх ЫКОО, Тааттатааҕы оҕо искусство оскуолатыттан, барыта 130-ча оҕо кыттыыны ылла. Оҕолор ирдэбил быһыытынан, саастарынан 5 категориянан, 2 группанан: А (ДШИ филиаллара), Б (орто оскуолалар) күрэхтэһэн илин-кэлин түһүстүлэр. Түмүк биирдилээн сололарынан, параларынан таҕыста. Кыайыылаахтар дипломнарынан, мэтээллэринэн наҕараадаланан үөрүү-көтүү өрөгөйүн биллилэр. Бары да санааларын ууран, олус үчүгэйдик, күүстээхтик бэлэмнэнэн кэлбиттэр. Хамаандаларынан эмиэ түмүк таҕыста. Ол курдук, саамай элбэх оҕону кытыннарбыт уонна элбэх кыайыыны суруммут А группаҕа (ДШИ)- Тааттатааҕы оҕо искусство оскуолатын хореография отделениета (сал-р Иванова Р.М., Ефимова А.М), Б группаҕа (орто оскуолалар) Игидэй орто оскуолатын үҥкүүһүттэрэ( сал-р Захарова А.И, Захарова А.К) кыайыылаах тахсаннар, кубогынан, дипломунан наҕараадаланнылар.
Инникитин маннык күрэхтэһиилэргэ орто оскуолалар суолта ууран, искусство биир кэрэ көрүҥэ, бальнай үҥкүүлэри толоруу көрүүлэригэр оҕолору кытыннаралларыгар баҕарабыт.
Курэхтэһиибит дьүүллүүр сүбэтигэр үлэлээбит улуустааҕы норуот айымньытын дьиэтин методиһыгар Васильева А.И., 1 нүөмэрдээх ЫКОО хореограбар Маркова Э.В, «Кэнчээри» оҕону сайыннарар киин хореограбар Рахлеева Н.Т., Оҕо спортивнай оскуолатын директорыгар Ноенохов Е.Е, оҕолору бэлэмнээн аҕалбыт салайааччыларбытыгар Голикова Е.П, Лукина Н.Г, Кононова Т.К, Захарова А.И, Андросов С.Д, Маркова Э.В., Семенова Л.Н уонна тэрээһиммитигэр күүс-көмө буолбут дьоммутугар барҕа махталбытын тиэрдэбит.
