Бүгүн Былатыан Ойуунускай аатынан театрга киһи бөҕөтө киирдэ, дьон үөрбүт көрүҥнээх.
Бүгүн манна үҥкүү түһүлгэтэ: культура уонна искусство колледжын бүтэрэр Наина Козлова отчуоттуур кэнсиэрэ. Наина «Дружба» ансаамбыл үҥкүүһүтэ, этэргэ дылы детсад саҕаттан үҥкүүнү таптаабыт,үҥкүүгэ ылларбыт оҕо, биһиги харахпыт далыгар улааппыт оҕо. Мин сиэмминээн Никиталыын биир көлүөнэ үҥкүүһүттэр. Розалия Михайловна бастаан станокка туруорбут оҕолоро, үҥкүүгэ уһуйбут наставниктара кини буоллаҕа, ону мин сиэним барарынан — кэлэринэн биллэҕим. Онтон кытаанах көрүүнү ааһан, Валентин Константинович салайар «Дружбатыгар» эрчиллэн, Наина хореограф буолар дьылҕатын таллаҕа, мин сиэним артыыс буоллаҕа.Көр, бу үҥкүү бэйэни сатаан көрүнэргэ, нууччалыы эттэххэ организованнай, эппиэтинэстээх, дьон ортотугар сатаан сылдьарга бэлэмниир эбит диэн көрөбүн.
Наина аҕыс саҥа үҥкүүнү туруорбут!!!
Уу, монгол, бүрээт,татаар үҥкүүлэрин энергетиката абытай, оҕолорбут да үҥкүүлүүллэрэ кэрэтин, уохтааҕын, көрөөччү олох өрө эгдэрэҥнии олордо, сөхпүт- махтайбыт ыһыы — хаһыы, өрө көтөҕүллүү…
» Встреча в кочевье» диэн үҥкүү дириҥ философиялаах үҥкүүтэ харахха быраҕыллар ,ол курдук кыргыттар, уолаттар муҥура биллибэт истиэпкэ көрсүһүүлэрэ, кымыс хайдах курдук таҥара аһын (божественный нектар или пища богов) курдуга, кымыһы кыргыттар оҥороллор уонна ону уолаттарга иһэрдэн, кинилэргэ күүс биэрэллэрэ — хайдах эрэ Греция мифтэрин санатта. Биһиги сахалар өбүгэбит Эллэй Боотур ыһыаҕын санатта, ол курдук бу үҥкүү күүстээҕэ,силигэ сиппитэ билиннэ, мин биир бэйэм онук ылынным. Ити үҥкүү кэтэҕэр истиэп көҥүл аттара,Чыҥыс Хаан саҕана аан дойдуну аймаабыт тыаллара билиннэ…Бу Наина дипломнай үҥкүүтэ эбит, һуу, ити хас хамсааһыны барытын тоҕотун дакаастаан, барытын ойуулаан көмүскүө буоллаҕа.Бу олох эргиирин үҥкүүтэ сөхтөрдө!
Маны кытта сэргэ эмиэ Таатта кыыһа, Бараһыылаптар оҕобут Диана Михайлова «Белые панамки» диэн Ленинград блокадатын оҕолоругар анаммыт үҥкүүтэ көрөөччү сүрэҕин аймаата…
Биир наһаа үчүгэй оҕону өйдөөн көрдүм, быһыыта — таһаата, сирэйэ- хараҕа үҥкүүгэ анаммыт оҕо -Чөркөөх оҕолорун монгуол үҥкүүтүн солист уола!
Үҥкүүнү практикант, хоту дойду кыыһа Мария Решетникова туруорбут.
Кэнсиэргэ барарбар сылайыам диэн куттаммытым да, балтараа чаастаах кэнсиэр биллибэккэ биир тыынынан ааста.
Аны кыракый ырыаһыттар ,чахчы, барыбытын үөртүлэр, Айхал Чупров, Лёва Тарасов чугдаарыччы,чаҕаарыччы ыллаан көрөөччү сүрэҕин сүүйдүлэр,ытыс тыаһа ньиргийэ олордо…
Аныгы рэп ырыанан Володя Егоров, Дьулус Уранаев эдэр көрөөччү биһирэбилин ылыахтарын ыллылар, бэйэлэрэ сүгүрүйээччилэрдээх ырыаһыттар эбит.
Тааттатын ааттатыа,тардыы көмүс үҥкүүлэри айыа — тутуо,» Дружба » ансаамбылга күүстээхтик үлэлиэ- хамсыа диэн таатталар кыыстарын Наинаны алҕаатылар.
Оттон кэнсиэри сахалыы,таатталардыы иэйэн — куойан,этэн — тыынан тапталлаах кыыһым Жанна Бурмистрова иилээн саҕалаан ыытта, оттон ыраах Ньурба театрыгар сиэним Никита Григорьев В.М. Шукшин кэпсээннэринэн спектакльга сүрүн геройу Стёпканы оонньоото,онон Розалия Михайловна уонна Валентин Константинович уһуйбут оҕолоро, «Дружба» ансаамбыл оҕолоро үҥкүүттэн кыым саҕан, культура байыастара буолан бэйэлэрин суолларын солоон, буһан — хатан иһэллэр…
Үҥкүүлээҥ, доҕоттор, үҥкүүлээҥ, үҥкүү үтүөҕэ, кэрэҕэ сирдиир!!!
Лидия Григорьева, кэнсиэртэн сүргэтэ көтөҕүллүбүт көрөөччү.
