Олунньу 11-12 күннэригэр Чурапчы улууһугар Өрөспүүбүлүкэтээҕи гуманитарнай чинчийэр институт күннэрэ тэрилиннэ. Чурапчы улууһун баһылыга Степан Анатольевич Саргыдаев Таатта, Амма улуустарын делегациятын ыҥыран көрүстэ. Таатта улууһун делегациятын улуустааҕы норуот айымньытын дьиэтин дириэктэрэ Г.Г.Вырдылин, Амма улууһун баһылыгы социальнай боппуруостарга солбуйааччы Ньургуйаана Ивановна Илларионова салайан, кыттыыны ыллылар. Боотур Уус историятын кинигэтин таһаарыы боппуруоһа ырытылынна. Гуманитарнай чинчийэр институт дириэктэрэ Сардаана Ильинична Боякова редколлегияны салайыыга ылсыбыт. Учуонайдарынан хамаанда тэриллибит. 2025-2027 сс. былааннаах үлэ баран, Москваҕа, Санкт-Петербурга архивка, музейдарга редколлегия үлэлээн дириҥ ис хоһоонноох кинигэ таһаарыы соруга турар. Ороскуоту Чурапчы, Таатта, Амма улуустарын дьаһалталара уонна гуманитарнай-чинчийэр институт уйунуохтаах.
Салгыы улуус дьаһалтатыгар төгүрүк остуол буолла. Историктар Пантелеймон Пантелеймонович Петров, Егор Петрович Антонов Боотур Ууһун историятын иһитиннэрдилэр. Амма краеведа Михаил Васильевич Алексеев, Тааттаттан "Албан аат" краеведение музейын сэбиэдиссэйэ, улуустаҕы бэтэрээн сэбиэтин бэрэссэдээтэлэ Маргарита Арисовна Попова билиҥҥи Тааттаттан 16 киһи Боотур Ууһун улууһугар кулубалаабытын эттэ. Төгүрүк остуолга төрдүбүт ууспут биирин, кулубалары сырдатыы, таҥара дьиэлэрин үлэлэрин, туохтан хас да улуустарга арахсыбыппытын уо.д.а. араас хабааннаах иһитиннэриилэр тула кэпсэтии буолла. Улуус делегациятыгар Тарбахов Алексей Михайлович - Чөркөөхтөөҕү политссыылка түмэлин үлэһитэ, Аржаков Михаил Геннадьевич - П.А.Ойуунускай аатынан Государственность түмэлин сэбиэдиссэйэ, Постникова Александра Николаевна - "Таатта" Ытык Күөллээҕи ойуу-бичик, литература түмэлин үлэһитэ, Билюкина Анна Константиновна - И.А.Аргунов аатынан Тааттатааҕы киин библиотека киирэн тэрээһиҥҥэ сырыттылар. Тааттатааҕы норуот айымньытын пресс киинэ
