Муус устар 23-25 күннэригэр Улуустааҕы норуот айымньытын дьиэтигэр биир дойдулаахпыт, РФ кинематографистар сойуустарын чилиэнэ, СӨ культуратын туйгуна, А.Д.Макарова аатынан Дьокуускайдааҕы Культура уонна Искусство коллеһын преподавателэ, оператор-постановщик Иван Александрович Семенов “Основы операторского мастерства” идэни үрдэтэр курс ыытта. Үөрэххэ улуус норуот айымньыларын дьиэтин үлэһиттэрэ уонна баҕалаах дьон үөрэннилэр.
Киинэ устар оператордар ньымаларыгар, күүстээх аныгы цифровой техниканан хайдах туттан устары, сөпкө настройкалаан, өҥү-дьүһүнү үчүгэйдик дьүөрэлиир, камера хайдах туран устуохтааҕын, сырдык уоту табыгастаахтык туруорууну уонна киинэ устуу быраабылаларын үөрэттэ. Киинэ устарга хамаанда үлэтин, ким туохха эппиэттиирин сиһилии кэпсээтэ, оператор диэн режиссер көрүүтүн, санаатын көрөөччүгэ тиэрдэр киһи буоларын быһаарда.
