«ГРАНИ АЛМАЗА» — өрөспүүбүлүкэҕэ бастыҥнар ааттаннылар

Күндү доҕоттор!
Бүгүн, кулун тутар 27 күнүгэр «Үргэл» Арт-галерея саалатыгар Российскай Федерация култууратын үлэһиттэрин күнүгэр анаммыт, Саха Өрөспүүбүлүкэтин култуура эйгэтигэр бастыҥ үлэһиттэри, тэрилтэлэри, айар кэллэктииптэри чиэстиир үөрүүлээх тэрээһин буолан ааста. Бу тэрээһин кэрэ эйгэни сүрэхтэрин сылааһынан дьоҥҥо-сэргэҕэ аныыр, өбүгэ үгэһин утумнуур, үүнэр көлүөнэҕэ үтүө холобур буолар, инники сайдыыны түстүүр култуура үлэһиттэрин үтүө түмүктээх үлэлэригэр ананна.

💫 2017 сылтан саҕалаан сыл ахсын кулун тутар 25к., Култуура үлэһитин күнүгэр, Өрөспүүбүлүкэтээҕи норуот айымньытын дьиэтэ Бүтүн Россиятааҕы, норуоттар икки ардыларынааҕы күрэхтэргэ кыайбыт, Гран-при хаһаайыттара айар кэллэктиип кыттыылаах «Грани алмаза» диэн улахан кэнсиэри тэрийэр үтүө үгэстээх. Бу сылга А.С.Пушкин аатынан нуучча театрыгар былааннаммыт улахан кэнсиэр Дойду үрдүнэн кутурҕан биллэриллэн көһөрүллэн, кулун тутар 27 к. судургутук тэрилиннэ.

💫Сахабыт сирэ бииртэн биир чаҕылхай, хатыламмат талаанынан баай. Бүгүҥҥү идэлээх күммүтүгэр үөрүүлээх түгэҥҥэ Саха Өрөспүүбүлүкэтин Бырабыытылыстыбатын үрдүк наҕараадатын бастыҥтан бастыҥ норуот айымньытын дьиэлэрэ, култуура үлэһиттэрэ, айар кэллэктииптэрэ туттулар. Олор истэригэр Россиятааҕы «Культура» национальнай бырайыак гранын кыайыылааҕа «Күн Чөмчүүк» фольклорнай норуодунай ансаамбыл «Бастыҥ айар кэллэктиип» аатын ылла!
Бастыҥнары Култуура уонна Духуобунай сайдыы министиэристибэтин I солбуйааччыта Мария Васильевна Турантаева уонна Өрөспүүбүлүкэтээҕи норуот айымньытын дьиэтин генеральнай дириэктэрэ Сергей Степанович Семенов чиэстээтилэр.
Бу үрдүк ситиһиибитинэн Таатта улууһун бука бары олохтоохторун эҕэрдэлиибит! Улуустааҕы норуот айымньытын дьиэтин салалтатыгар, биһиги айар үлэбитин сэргиир, сэҥээрэр бар дьоммутугар, куруутун өйүүр-өйдүүр бары үлэлиир тэрилтэбит салалтатыгар, дьиэ кэргэммитигэр махталбытын тиэрдэбит, чэгиэн-чэбдик буолууну баҕарабыт! Дойдубут чэчириирин туһугар!🌿🌿🌿🌿🌿🌿🌿🌿🌿

«Күн Чөмчүүк» норуодунай ансаамбыл кыттыылаахтара