Кулун тутар 22 күнүгэр Өрөспүүбүлүкэ биир биллиилээх кыраайы үөрэтээччитэ, аһаҕас халлаан анныгар турар Чөркөөхтөөҕү политсыылка уонна история түмэлин Д.К.Сивцев-Суорун Омоллооннуун сүһүөҕэр туруорсубут, бастакы сэбиэдиссэй, «Үлэҕэ килбиэнин иһин» медаль кавалера Людмила Николаевна Григорьева 80 сааһын туолбут күнүгэр Былатыан Ойуунускай аатынан Таатта народнай театрыгар үбүлүөйдээх тэрээһин ыытылынна. Ыраахтан-чугастан Людмила Николаевна сырдык олоҕун ахтан-санаан, түмэл инники сайдар тосхолугар төгүрүк остуол тула олорон кэскиллээх кэпсэтии буолла. Үлэ сонун сүүрээнин тобуларга санаа атастаһыыта, этиилэр киирдилэр. Төгүрүк остуол үлэтин түмүгүнэн Л.Н.Григорьева аатын үйэтитэргэ кини аатынан фонда олохтооһун, музей сайдар кэскиллээх боппуруостарын тула резолюция барыла ылылынна. Тэрээһини Чөркөөх түмэлин сэбиэдиссэйэ М.А.Протодьяконов иилээн-саҕалаан ыытта. Түмэл үлэһиттэрэ Людмила Николаевна тус архыыбыттан таҥан сэдэх хаартыскаларын, кинигэлэрин, малларын уопсайа 200-тэн тахса экспонаты аҕалан быыстапкаҕа туруордулар. Тэрээһиҥҥэ улуус баһылыга А.С.Бурцев, Дьокуускай куораттан «Саха музейа» ГБУ директорын солбуйааччы А.Ховров, С.А.Новгородов аатынан «Айар» национальнай кинигэ кыһатын директорын солбуйааччыта В.Луковцев, Өксөкүлээх Өлөксөй сиэнэ Р.Р.Кулаковская, «Таатта» литературнай-художественнай музей директора В.Д.Таппыров, Таатта улууһун культуратын управлениетын салайааччыта Г.Г.Вырдылин,Тааттатааҕы гимназия директора п.н.к. И.А.Сивцева, Людмила Николаевна бырааттара кыраайы үөрэтээччилэр, «Симэх» норуот искусствотын уонна уус-уран оҥоһуктарын салаатын салайааччыта Д.К.Осипов, П.П.Григорьев уо.д.а. аймахтара кыттыыны ыллылар. Эһиилгэттэн Л.Н.Григорьева аатынан стипендия Таатта улууһун бастыҥ кыраайы үөрэтээччилэригэр, музей үлэһиттэригэр иҥэриллэр буолуоҕа.
✨Эбиэт кэннэ Чөркөөх музейын быыстапкалыыр саалатыгар аймахтара граниттан оҥотторбут Людмила Николаевнаҕа анаан оҥоһуллубут мемориальнай досканы аһыы сиэрэ-туома ыытылынна.
