МАНДАР УУС АЛГЫҺЫНАН САҔЫЛЛЫБЫТ «ОЛОҤХО.ОҺУОР.ОЙУУ.» ПЕТР ДОРГУЕВ АЙАР БЫЫСТАПКАТА

Угуттаан таһымныыр үрэх кэриэтэ уус-уран тыллаах олоҥхоһуттар уутуйан, уран тарбахтаахтар төбүрүөннээн үөскээбит талыы-талба Тааттабытыгар бүгүн – Олоҥхо күнэ!
Өбүгэлэрбит кичэйэн-харыстаан хаалларбыт духуобунай баайдарын, Олоҥхо этигэн тылын-өһүн, баай-талым ис хоһоонун билиҥҥи көлүөнэ хайдах ылынарын, олох бары эйгэтигэр, күннээҕи олохпутугар сүрүннээн айар үлэҕэ, ойуулуур-дьүһүннүүр искусствоҕа оһуор-мандар оҥорон, хайдах көрөрүн бүгүҥҥү быыстапкаҕа көрдүбүт. Ойууһут, графика дизайнера Петр Доргуев «Олоҥхо. Оһуор. Ойуу» айар быыстапката алгыстаах үтүө-мааны күҥҥэ Иван Иванов доллоһутар тойугунан саҕаланна.
Уол оҕо барахсан уолугунан тыынан, атаҕынан дугуйданан, илиитин иминэн, өркөн өйүнэн, оһуор-ойуу умсулҕаныгар умса түспүт иэйиитин Таайын Борис Федорович Неустроевы- Мандар Ууһу кытта ситимниир. Мэник-тэник ойор күннээх оҕо сааһыгар уруһуйдаан бооччойо олорорун дьоно көрдөхтөрүнэ «О5обут Таайын курдук уруһуйдьут буолуо» дииллэрэ эбитэ үһү.
Ытык киһибит Борис Федорович Неустроевка Мандар-Уус Петр айар быыстапкатыгар бэлэм буолтун былырыын эппитин, үлэлэрэ чахчы да сиппитин-хоппутун, хомуурунньук альбом буолан тахсыан сөптөөҕүн, сиэн быраатын түбүгүн көрөн сүрэҕэ үөрбүтүн, дууһата манньыйбытын эттэ, мааны тылларын анаата. Улуус дьаһалтатын аатыттан Дьахтар сэбиэтин салайааччыта Варвара Будикина махтал суругу туттарда. Таатта нэһилиэгин сүрүн испэсэлииһэ Туйаара Куприянова көрүөхтэн кэрэ үлэлэри айбыт чаҕылхай ыччакка эҕэрдэ суругу туттарда. Улуустааҕы норуот айымньытын дьиэтин дириэктэрэ Гаврил Вырдылин үөлээннээҕин Петр Доргуевы аныгы үйэ тэтимигэр тэҥҥэ хардыылаһан иһэрин, буолаары турар Манчаары оонньууларыгар брендбукка үлэлэһэрин бэлиэтээтэ. 32#дээх Баһаары кытта охсуһуу этэрээт салайааччытын солбуйааччыта Иван Рахлеев өрөспүүбүлүкэ баһаарынай чаастара Петр оҥорбут логотибын туһаналларые киэн тутта кэпсээтэ. Тааттатааҕы лицей дириэктэрэ Изабелла Сивцева Петр ойууларыгар тимиргэ туттуллар оһуордары ойууларыгар хото туттарын чорботто, хаан тамайыыта тахсан, чахчы да тимир ууһугар чугаһын эттэ. «Таатта-Арт» худуоһунньук учууталлар түмсүүтүн салайааччыта Марианна Степанова айар умсулҕан үөһүгэр сылдьар Петр дьикти кэрэ үлэлэрин худуоһунньук хараҕынан хайҕаата, түмсүүгэ аан маҥнайгынан айар быыстапкатын тэрийбитин үрдүктүк сыаналаата. Быыстапкалааччы эдьиийдэрэ бүгүҥҥү түһүлгэ долгутуулааҕын, бырааттара бачча сиэдэрэй үлэлээҕиттэн сөхтүлэр-махтайдылар. Оскуолаҕа бииргэ үөрэммит доҕотторо Петя наар харандааһын, уруһуйдуур альбомун кыбына сылдьарын, уруһуйун сөҕө көрөллөрүн эттилэр.
Бүгүҥҥү быыстапкаҕа Петр Сергеевич ойууһут быһыытынан сиппит-хоппут, бэйэтин анал суолун булуммут дьикти кэрэ түһүлгэтин түстээтэ. Этиэхтэн дьикти хартыыналарын олоҥхо оһуорунан сиэдэрэйдик симэммит багетынан таҥастаан, көрүөхтэн кэрэ үлэлэри эһиги дьүүлгүтүгэр туруорда.
Таатта Олоҥхо дойдута буоларын туоһулуу Олоҥхо тылынан саҥарар-иҥэрэр, Олоҥхо оһуорунан ойуулуур-дьүһүннүүр ыччаттаахпытын тухары дойдубут аата ааттана, суон сураҕа иһиллэ туруо!
Быыстапка кулун тутар 11 к. диэри дьону-сэргэни үөрдүөҕэ.

Наталья Григорьева, Картиннай галерея үлэһитэ