ААН ДОЙДУТААҔЫ ТУЛАЛЫЫР ЭЙГЭ ХАРЫСТАБЫЛЫН УОННА ЭКОЛОГИЯ КҮНЭ
Бэс ыйын 5 күнүгэр А.Е.Кулаковскай – Өксөкүлээх Өлөксөй скверигэр үгэс быһыытынан ыытыллар Аан дойдутааҕы тулалыыр эйгэ харыстабылын уонна экология күнүгэр «Чэчирээ, чэлгий күөх Тааттам» тэрээһин үрдүк таһымҥа ааста.
Тэрээһин кыттыылаахтарын, ыалдьыттарын “Таатта улууһа» муниципальнай оройуон баһылыгын солбуйааччы Никифор Жерготов, “Таатта нэһилиэгэ» тыа сирин түөлбэтин баһылыга Егор Павлов, Улуустааҕы айылҕа харыстабылын инспекциятын салайааччыта Георгий Николаев эҕэрдэ тылларын тиэртилэр.
Бу күн сквергэ 50 сыл сүүс сүүстэриттэн өйөнсөн олорор, дьоллоох кыһыл көмүс сыбаайбалаах ытык – мааны ыаллар уонна быйыл саҥа ыал буолбут дьиэ — кэргэттэр декоративнай талах олортулар.
Маны таһынан култуура уонна айар ситим сылынан култуура тэрилтэлэрин үлэһиттэрэ эбии хатыҥ мас уонна талах олортулар.
Экология күнүгэр анаан «Садовое творчество» эдэр натуралистар станцияларын иитиллээччилэрин быыстапката турда, туттуллубат пластиковай, тимир хаппахтары тутар «Туһалаах хаппахтар» аахсыйа ыытылынна. Таатта нэһилиэгин дьаһалтатын көҕүлээһининэн тэрилтэлэр сыһыарыллыбыт палисадниктары ыраастаатылар, общественнай түмсүүлэр сквердары хомуйууга кыттыстылар.
Тэрээһиҥҥэ кэлбит ыалдьыттар арассаада арааһын атыылаһан, илии тутуурдаах, өттүк харалаах тарҕастылар.
Улуустааҕы норуот айымньытын дьиэтигэр эдэр натуралистар станцияларын экзотическай кыылларын быыстапката турда, сэргэх «Экскурсовод — кипер» диэн кыыллары, көтөрдөрү иитэр оҕолор икки ардыларыгар күрэс тэрилиннэ, кыайыылаахтар грамотанан уонна «Мозаика» маҕаһыын сертификаттарынан наҕараадаланнылар.
Тулалыыр эйгэбитин харыстыаҕын, кэрэни, үтүөнү үксэтиэҕин!
