От ыйын 11 күнүгэр кэрэ айылҕалаах Хадаайы түмэлигэр «Чыычаах оҕото» диэн Евдокия Попова (Захаркина) бастакы быыстапката арылынна.
Манна Евдокия олоҕун умнуллубат түгэннэрин, дууһатын дириҥ далайын, ис санаатын дьүһүйбүт, өҥүнэн-дьүһүнүнэн тыыннаабыт цифровой иллюстрация ньыматынан оҥоһуллубут хартыыналарын көрдүбүт.
Тоҕо «Чыычаах оҕото»?
“Төрөппүттэрим миигин кыра эрдэхпиттэн «чыычааҕым оҕото» диэн ааттыыллара, билигин да кэргэним миигин «чыычаах» диэн таптаан ыҥырар. Ону таһынан, төрөөбүт Тааттабын кытта ыкса ситимнээх. Суорун Омоллоон, Өксөкүлээх Өлөксөй, Былатыан Ойуунускай, Алампа курдук улуу дьоммут айымньылара көтөрдөрү кытта ыкса ситимнээхтэр. «Таалар налыы хонуулаах, Талба нарын талахтаах, Ыллыыр ымыы чыычаахтаах» диэн Тааттабытын хоһуйаллар. Ымыы чыычаах дьиэ кэргэн сыаннастарын, дьоллоох олоҕу, сылаас сыһыаны, истиҥ тапталы көрдөрөр”.
“Киһи олоҕо чыычаах түннүгүнэн элэс гынан ааспытын курдук” дииллэринии быыстапка Евдокия олоҕун үс кэрчигин көрдөрөр: оҕо саас, эдэр саас уонна билиҥҥи олох.
Бу хартыыналары көрөн хас биирдии киһи бэйэтин көрүүтүнэн, өйүнэн-санаатынан араастаан ылыныа дии саныыбыт. Саҥа иэйиилэри киллэриэ, оҕо сааһы, ааспыт кэми ахтан аһардыа, дойдутун, дьоннорун ахтыа, тапталы күүһүрдүө, саҥаны оҥорорго угуйуо, хаалларбыт дьыалатын толорорго көҕүтүө, оҕолорго холобур буолуо диэн эрэнэбит.