«Ойор-тэбэр оһуохай» өрөспүүбүлүкэтээҕи оҕолорго, ыччакка оһуохай күрэһигэр Уус Тааттаттан Алена Колодезникова ситиһиитэ
👫👫👫👫👫
Кулун тутар 27 күнүгэр Дьокуускай куорат Арчы дьиэтигэр өрөспүүбүлүкэҕэ оҕо оһуохайын оскуолатын төрүттээбит Дмитрий Яковлевич Федотов төрөөбүтэ 90 сааһыгар аналлаах «Ойор-тэбэр оһуохай» өрөспүүбүлүкэтээҕи оҕолорго, ыччакка оһуохай күрэһэ ыытыллынна.
Тэрийээччилэринэн «Үөһээ Бүлүү улууһа (оройуона)» муниципальнай оройуон дьаһалтата, Үөһээ Бүлүүтээҕи культура уонна духуобунай сайдыы департамена, Үөһээ Бүлүүтээҕи норуот айымньытын киинэ киэҥ хабааннаах оһуохай түһүлгэтин тэрийэн ыытта. Түөлбэ оһуохайдарын, төрүт үгэстэрин дьоҥҥо-сэргэҕэ тиэрдэр сыаллаах күрэскэ Таатталыы оһуохайы Уус Тааттатааҕы оҕо искусствотын оскуолатын уһуйуллааччыта Алена Колодезникова таһааран, дьоҥҥо-сэргэҕэ билиһиннэрдэ. Иккис бөлөххө (15-17 саастаахтарга) тоҕус улуустан 16 оҕоттон I ҮРДЭЛИ ылары ситистэ. Алена сааскы сынньалаҥҥа уһуйааччытынаан Айта Егоровна Васильеваны кытта сылдьан өрөспүүбүлүкэ таһымыгар ыытыллар араас фольклорнай күрэстэргэ кыттан үгүс ситиһиилэрдээх, олунньу ыйга А.М.Мойтохонова авторскай “Күн оһуохайа” бырайыакка кыттыбыта. Бүгүҥҥү оһуохай түһүлгэтигэр ол оҕолорун кытта күөн-көрүстэ.
Аленаҕа саха фольклорунан дьаныардаахтык дьарыктанан инникитин да ситиһиилэр кэлэ туралларыгар баҕарабыт.
