Бүгүн улуустааҕы Норуот айымньытын дьиэтигэр Гиирэ спордун федерациятын уонна УНАДь тэрийиитинэн, улуус гиирэҕэ хамаандатын чилиэннэрин кытта көрсүһүү ыытылынна.
Биир дойдулаахпыт, Гиирэ спордугар бастакы Саха АССР спордун маастара үрдүк аатын ылбыт Иустин Кулачиков ситиһиитин, дьарыгын салҕаан, оскуола оҕотуттан саҕалаан ветеран саастаах спортсменнарга тиийэ дьарыктаналлар. Бу чэпчэкитэ суох, быыппастар былчыҥ, иҥиир, күүстээх санаа түмүллүбүт спорт көрүҥэ улууспутугар баара, сайда турара барыбытын үөрдэр.
Көрсүһүүнү Гиирэ спордун федерациятын сал. Гаврил Вырдылин иилээтэ. Эҕэрдэ тылы Таатта улууһун баһылыгын социальнай боппуруоска солбуйааччы Святослав Сунхалыров, депутаттар улуустааҕы мунньахтарын бэрэс. Петр Максимов, И.Г.Федосеев аатынан оҕо спортивнай оскуолатын директора Егор Ноенохов, спорт управлениетын начальнига Андрей Сидоров,»Модун» нац. спорт киинин тренера Иннокентий Бояров эттилэр. Оттон улуустааҕы Дьахтар сэбиэтин бэрэс. Варвара Будикина гиирэ спордугар элбэх ситиһиилэрдээх, общественница Наталья Захарованы Почетнай грамотанан бэлиэтээтэ.
Спорт салаатын тутаах сал. Андрей Сидоров саҥа термини тутуһан болгуону анньыыга төрөөбүт дойдубут тыына, бэйэ истиэнэтэ ситиһиини аҕаллын диэн туран, «Манчаары оонньууларыгар» улуус хамаандатын спортивнай таҥаһын туттарда.
Спортсменнарбытыгар 13-16 күннэргэ ыытыллар тимир болгуоҕа Иустин Кулачиков аатынан өрөспүүбүлүкэтээҕи күрэскэ кыайыыны баҕарабыт!
Алгысчыт Иван Иванов үтүө-мааны тыллара барыгытыгар тиийиэхтин!
