Таатта улууһугар Олоҥхо күннэрэ саҕаланна
Олунньу 28 күнүгэр Таатта улууһугар XXI-с төгүлүн Олоҥхо уонна Саха өрөспүүбүлүкэтин Норуот маастарын күннэригэр аналлаах «Олоҥхо сатабыла» этнокультурнай тэрээһин ыытылынна. Олоҥхо күн айхаллаах алгыһын ыытар СР үөрэҕириитин културатын туйгуна, Петр Васильевич Толстяков аатынан Чөркөөхтөөҕү народнай театрын режиссера Мотрена Яковлева ыытта .Тэрээһитн аһыллыытыгар улуустааҕы норуот айымньытын дьиэтин директор Г.Г.Вырдылин, СӨ олоҥхо ассоциациятын Тааттатааҕы олоҥхо филиалын бэрэссэдээтэлэ И. А.Сивцева эҕэрдэ тыллары эттилэр. Үгэскэ кубулуйбут нэһилиэгинэн олоҥхону толоруу дьүүллүүр сүбэтинэн ЮНЕСКО стипендиата, Ийэ олоҥхоһут Петр Егорович Решетников-Көһөҥө Бүөтүр төрөппүт кыыһа, олоҥхону толорооччу, Олоҥхо ыһыаҕын биирдиилээн толорууга хас да төгүллээх үрдэл кыайыылааҕа, “Дьолуо”фольклорнай ансаамбыл кыттыылааҕа Розалия Докторова, Арктическай государственнай культура уонна искусства институтун норуот айымньытын салаатын преподавателэ, Олоҥхо ыһыаҕын ыччаттарга муҥутуур кыайыылааҕа Марфа Аммосова, Олоҥхо тыйаатырын артыыһа, өрөспүүбүлүкэтээҕи «Олоҥхо дойдутун оҕотобун”, “Муҥха олоҥхото”, “Олоҥхо тойуга” ыччат ортотугар олоҥхону толорооччуларын күрэһин Кылаан кыайыылааҕа Яна Ньургусова сыаналаатылар. Түмүккэ I Үрдэли Дьохсоҕон олоҥхоһуттарын бөлөҕө, салайааччы А.Н.Попов, II Үрдэли Тыараһа олоҥхоһуттарын бөлөҕө, салайааччы М.Ф.Говорова, III Үрдэли Уус Таатта олоҥхоһуттарын бөлөҕө, салайааччы А.Н.Багардынов, «Түөлбэ олоҥхотун үһүйэн үйэтитээччилэр» анал ааты Орто Амма олоҥхоһуттарын бөлөҕө, салайааччы В.А.Парфенова ыллылар.
