Перейти к содержанию

«Күн оһуохайа» телевизионнай оҕо оһуохайын күрэҕэ саҕаланна

Бүгүн, олунньу ый 4 күнүгэр, Дьокуускай куоракка «Күн оһуохайа» телевизионнай өрөспүүбүлүкэтээҕи оһуохай күрэҕэ саҕаланна.

Олунньу 4-13 күннэригэр «Күн оһуохайын» кыттыылаахтара — Саха Сирин араас муннуктарыттан мустубут оҕолор «Бэс чагда» оҕо лааҕырын баазатыгар 5 түһүмэҕинэн оһуохайга күөн күрэхтэһиэхтэрэ.

Бу бырайыак, Саха Өрөспүүбүлүкэтин култуура үтүөлээх үлэһитин, СӨ култуура уонна үөрэҕэрии туйгунун, Саха Сирин Аан Дархан оһуохайдьытын, Үөһээ Бүлүү улууһун култуура уонна духуобунай сайдыы департаменын салайааччытын Айталина Михайловна Мойтохонова — Сахаайта көҕүлээһининэн ыытыллар. Бырайыак салайааччыта — «Саха» көрдөрөр, иһитиннэрэр хампаанньыйа дириэктэрэ Олег Егорович Колесов.

«Күн оһуохайа» телевизионнай оҕо оһуохайын күрэҕэ үһүс төгүлүн ыытыллар. Бырайыак СӨ Бырабыыталыстыбатын Бэрэсэдээтэлин солбуйааччытын
Сергей Васильевич Местников, СӨ култуура уонна духуобунай сайдыы миниистирин Афанасий Иванович Ноев, маны сэргэ СӨ үөрэҕэрии уонна наука министиэристибэтин өйөбүллэринэн ыытыллар.

Кыттааччылар 10 күн устата «Бэс чагда» оҕо лааҕырыгар Саха Сирин үтүөлээх оһуохайдьыттара уһуйааччылаах араас ньымаларга, тута хоһуйарга, түөлбэнэн оһуохай араастарыгар үөрэниэхтэрэ.

Олунньу 13 күнүгэр НВК Саха ханаалга быһа эфирга киэһээ 19:00 чааска күрэх түмүктүүр түһүмэҕэ финал ыытыллыаҕа. Маны сэргэ бу нэдиэлэ устата НВК Саха ханаалга күн ахсын «Күн оһуохайа» бырайыак күннүгэр күрэх хаамыытын көрдөрүөхтэрэ.

Финал түмүгэр дьүүллүүр сүбэ быһаарыытынан кыайыылаах оһуохайдьыт 100 тыһыынча солкуобайынан, онтон көрөөччүлэр смс куоластааһыннарын түмүгэр кыайыылаах оһуохайдьыт 50 тыһыынча солкуобай харчыннан наҕараадаланыахтара.

Таатта улууһун Дьохсоҕон, Чымнаайы, Уус- Таатта, Ытык- Күөл оскуолаларыттан4 оҕо кыттыыны ылаллар.
Бу бырайыакка иккис сылын түөлбэ оһуохайын үөрэтэр наставнигынан СР оһуохайын үтүөлээх этээччитэ, Таатталыы оһуохайы тарҕатааччы Лариса Анатольевна Попова үлэлиэҕэ.
Оһуохайдьыт оҕолорбутугар ситиһиини баҕарабыт🌿🌿🌿