Сэтинньи 27 күнүгэр Саха Өрөспүүбүлүкэтин Правительствотын 2 нүөмэрдээх дьиэтигэр суруйааччылар сойуустарын 90 сылыгар аналлаах үөрүүлээх тэрээһин буолан ааста. Мунньаҕы Правительство солбуйааччы бэрэссэдээтэлэ Сергей Васильевич Местников, суруйааччылар сойуустарын бэрэссэдээтэлинэн өр сылларга салайбыт Наталья Ивановна Харлампьева, култуураҕа уонна духуобунай сайдыыга миниистирэ Афанасий Иванович Ноев ыыттылар. Таатта улууһуттан суруйааччылар сойуустарын бэрэссэдээтэлэ Гаврил Андросов, норуот суруйааччыта Елена Слепцова — Куорсуннаах, Петр Самсонов — Бүөтүр Хара, Ольга Макарова, Ольга Корякина — Умсуура, Анатолий Слепцов, Валерий Андросов, Утум Захаров кыттыыны ыллылар. Татарстан суруйааччыларын сойууһа ыалдьыттаата. Е.Слепцова-Куорсуннаах Ил Дархан народнайдарга бэлэҕин, Анатолий Слепцов С.В.Местников махталын, О.Корякина-Умсуура Россия суруйааччыларын сойууһун грамотатын ыллылар. Таатта улууһун баһылыгын эбээһинэһин толорооччу Руслан Игнатьевич Захаров эҕэрдэ суруктарын, бэлэхтэри Гаврил Гаврильевич Андросовка, Наталья Ивановна Харлампьеваҕа улуустааҕы норуот айымньытын дьиэтин салайааччыта Гаврил Гаврильевич Вырдылин туттарда. Былатыан Ойуунускай төрүттээбит уонна бастакынан салайбыт суруйааччылар сойуустарын Таатта дьоно-сэргэтэ өссө төгүл эҕэрдэлиибит. Классик уонна билиҥҥи суруйааччыларбытынан киэн туттабыт уонна айар үлэҕитигэр ситиһиилэри баҕарабыт.
Саргы-дьаалы улааттын
Сахалыы саҥа сатараатын
Саха омук сайыннын
Уруй! Уйгу! Уруй-айхал!!!
Тааттатааҕы норуот айымньытын дьиэтин пресс киинэ
