Ыам ыйын 24 күнүгэр Таатта улууһун килбэйэр киинигэр Саха Өрөспүүбүлүкэтин үрдүнэн биллэриллибит Оһуохай күнэ улуус баһылыга Бурцев А.С. оһуохайдьыттары кытта көрсүһүүтүттэн саҕаланна. Өрөспүүбүлүкэҕэ ситиһиилээх бастыҥ оһуохайдьыттарга А.Поповка, И.Потаповка, И.Ивановка бочуотунай грамоталары туттарда.
Ол кэннэ «Таатта оһуохайын инники сайдыыта» төгүрүк остуол ыытылынна.
Төгүрүк остуолга култуура, үөрэх үлэһиттэрэ, кыраайы үөрэтээччилэр, оһуохай этээччилэр, айар түмсүүлэр, уопсастыбанньыктар, сырдатар-иһитиннэрэр үлэһиттэр кыттыыны ылаллар. Улууска түөлбэ оһуохайа сайдыытын тула кэпсэтии ыытыллына, үлэ былааныгар этиилэр киирдилэр, оһуохай хамсааһынын саҥа састааба бигэргэннэ. А.И.Аргунов аатынан киин библиотека «Күн оһуохайа» кинигэ быыстапкатын туруордулар.
Бу күн сарсыарда «Алтан чуораан алгыстаах оһуохайа» Таатта нэһилиэгин оскуолаларын, лицейы бүтэрээччилэр өрөспүүбүлүкэтээҕи оһуохай флешмобугар кыттыннылар.
Күнүс «Ил Эйэ оһуохайа» киин трубинаҕа СӨ үтүөлээх оһуохай этээччилэрин кыттыылаах оһуохай тэриллиннэ.