Бүгүн, муус устар 1 күнүгэр, Тааттаттан төрүттээх ураты буочардаах, өрөспүүбүлүкэҕэ тарбахха баттанар биир иллюстратор-художник, модельер, иистэнньэҥ, «Дружба» оҕо үҥкүү народнай ансаамбылын художник-модельерынан үлэлээбит Саргылана Старостина — Сунхалырова үбүлүөйдээх сылыгар, Саха сиригэр маҥнайгы идэтийбит, норуот худуоһунньуга И.В.Попов төрөөбүтэ 150 сылыгар, бэйэтин айар үлэтин 35 сылыгар анаан «Кэрэ сыдьаайар сырдыга» айар быыстапкатыгар кэрэни кэрэхсиир бар дьонун түмтэ. Хартыына галереятыгар тэрээһин үөрүүлээх чааһа, “Чуораанчык” оҕо сурунаалыгар, “Бичик”- “Айар” кинигэ кыһатыгар оҥорбут 55 иллюстрациятын уруһуй быыстапката, Куйаарга илиитин сылааһынан кэнники кэмҥэ тикпит таҥаһын дефилетэ, уран оҥоһуктарын аукциона ыытылынна. Манна киирбит үп Саргылана Егоровна үлэлээбит Ф.С.Аргунов аатынан оҕо искусствотын оскуолатын ойуулуур-дьүһүннүүр отделениятын үөрэнээччилэригэр ананна. Күн устата Саргылана Егоровнаҕа истиҥ эҕэрдэ, махтал тыллара дьаһалтаттан, чугас дьонуттан, дьүөгэлэриттэн, аймахтарыттан, доҕотторуттан ананна.
Маннык кэрэ талааннар инникитин сайда турдуннар, төрөөбүт дойдуларын киэҥ сиринэн куруутун ааттата, сайыннара, кэрэхсэтэ, кэрэҕэ уһуйа турдуннар.
