Бүгүн, кулун тутар 16 күнүгэр, айар тыл аҕата, саха литературатын төрүттээччи, төрөөбүт тылын, норуот историятын уонна култууратын чинчийээччи, фольклору утумнаан хомуйааччы, сырдатааччы, наука араас көрүҥнэригэр маҥнайгы суолу тэлээччи, сахалартан биир бастакы учуутал, киэҥ, дириҥ көрүүлээх гуманист-философ АЛЕКСЕЙ ЕЛИСЕЕВИЧ КУЛАКОВСКАЙ-ӨКСӨКҮЛЭЭХ ӨЛӨКСӨЙ күн сирин көрбүт кэрэ күнүн бэлиэтээтибит.
СӨ Ил Дархана Айсен Сергеевич Николаев 2023-2027 сыллары саха литературатын төрүттээччитэ, бөлүһүөк Алексей Елисеевич Кулаковскай — Өксөкүлээх Өлөксөй биэс сылынан биллэрбитэ. Бу сыллар устата Өксөкүлээх күнүн бэлиэтээһин, араас көрсүһүүлэр, дьоһуннаах кэпсэтиилэр, тэрээһиннэр өрөспүүбүлүкэ үрдүнэн ыытыллаллар.
Сарсыарда «Таатта» литература-художественнай түмэлигэр, Хадаайыга, Өксөкүлээх Өлөксөй балаҕанын көмүлүөк оһоҕуттан өрөспүүбүлүкэ үрдүнэн көстөр быһа холбонуунан «Өксөкүлээх сардаҥата» акция уоту ылыы тэрилиннэ. Манна Таатта улууһун баһылыга Айаал Семенович Бурцев, Өксөкүлээх Өлөксөй сиэнэ, РФ үөрэҕириитин туйгуна, СӨ үөрэҕириитин бочуоттаах бэтэрээнэ, Таатта улууһун бочуоттаах олохтооҕо Рива Реасовна Кулаковская, түмэл директора В.Д.Таппыров, Улуустааҕы норуот айымньытын дьиэтин директора Г.Г.Вырдылин тыл эттилэр. Рива Реасовна аал уоту алаадьынан алгаан Өксөкүлээх сардаҥатын сандаарта.
Салгыы А.Е.Кулаковскай — Өксөкүлээх Өлөксөй скверыгар сибэкки дьөрбөтүн ууруу, сүгүрүйүү сиэрэ-туома ыытылынна. «Таатта улууһа» МО баһылыга А.С.Бурцев, Таатта улууһун депутаттарын Сэбиэтин бэрэссэдээтэлэ П.П.Максимов, Өксөкүлээх сиэнэ Р.Р.Кулаковская, Улуустааҕы үөрэх управлениятын начальнига И.И.Дягилев тыл эттилэр. Тааттатааҕы лицей 10 кылааһын үөрэнээччилэрэ «Ортоку олук алгыһа» хоһоонунан эҕэрдэлээтилэр.
